वयाची अट

गुरुजी शाळेत विद्यार्थ्यांना समजावून सांगतात की रोज वर्तमानपत्र वाचल्याने चालू घडामोडींची माहिती मिळते. या जगात कसं जगायचं ते कळतं.

बंड्या दुसर्‍याच दिवसापासून वर्तमानपत्र चालू करतो.
तिसर्‍या दिवशी शाळेत गेल्यावर...

बंड्या : गुरुजी, तुम्ही आम्हाला रोज रोज काहीही प्रश्न विचारता. आज मी तुम्हाला एक प्रश्न विचारणार आहे. बघू तुम्हाला उत्तर येतंय का?

गुरुजी : ठीक आहे, विचार.

बंड्या : सांगा पाहू, की सरकारने मतदान करता यावे म्हणून नागरिकाचे वय १८ वर्षे असल्याचा कायदा केला आहे. पण लग्नाचं वय मात्र २१ वर्षे केलेलं आहे. असं का?

गुरुजी : (जरा डोकं खाजवतात) कारण माणूस १८ वर्षांनी सज्ञान होतो म्हणून.

बंड्या : मग लग्नाचं वय पण १८ वर्षेच असायला पाहिजे ना?

गुरुजी : (जरा विचार करून) हो, हो, बरोबर आहे.

बंड्या : पण तसं नाही गुरुजी, जरा विचार करून सांगा.

गुरुजी : (डोक्यावरची टोपी काढून बोटांची वाढलेली पाचंही नखं पांढर्‍या केसांत घालून थोडा वेळ खाजवतात) हरलो बुवा. तूच सांग.

बंड्या : कारण, सरकारलाही माहीत आहे की कमी वयातही देश सांभाळणे हे बायको सांभाळण्यापेक्षा सोप्पं आहे.