पुण्यातील कंपनी

पुण्यातील एका खाजगी कंपनीत कामावर नवीन रुजू झालेल्या कर्मचार्‍याला त्याचा वरीष्ठ अधिकारी विचारतो, “काय हो. आज तुमचा पहिलाच दिवस.”

नवीन कर्मचारी : हो सर.

सर : आमच्या ऑफिसचा एक नियम आहे. रोज आत येताना आपले बूट बाहेरच्या पायपुसणीवर स्वच्छ करूनच यायचे. तुम्ही व्यवस्थित पुसून आलात ना.

नवीन कर्मचारी : हो सर.

सर : आमच्या ऑफिसचा अजून एक नियम आहे, कधीही खोटं बोलायचं नाही. हे मुद्दामुन सांगतोय, कारण बाहेर पायपुसणीच नाहीये.

बेवडा हॉट सीटवर

एकदा एक बेवडा “कोण होईल मराठी करोडपती” मालिकेत भाग घेतो.

त्याला सचिन खेडेकर एक प्रश्न विचारतात, “एक हजारासाठी हा प्रश्न.”

“भारतात सर्वात जास्त बर्फ कुठे पडतो? आणि पर्याय आहेत...”

बेवडा : थांबा, थांबा. पर्याय कसले देताय. उत्तर अगदी सोप्पं आहे. सकाळी ८ वाजण्यापूर्वी काश्मीरमध्ये आणि संध्याकाळी ८ नंतर विस्कीच्या बाटलीमध्ये.

निर्मलबाबा की जय !!!

भगवान श्रीकृष्ण : वत्सा, फळाची अपेक्षा न करता कर्म करीत रहा; म्हणजे तुझ्यावर परमेश्वराची कृपा होईल आणि यथावकाश योग्य ते फळही मिळेल.

निर्मलबाबा : मुला, लाल चटणीऐवजी हिरवी चटणी खात जा; म्हणजे तुला परमेश्वराची कृपा प्राप्त होईल.

ओये संता...संता ओये

संता एकदा आपल्या एका पायात सफेद तर दुसर्‍या पायात काळा बूट घालून शाळेत जातो.

शिक्षक : अरे, काय रे हे संता? जा घरी जाऊन बूट बदलून ये.

संता : त्याचा काहीच उपयोग नाही सर. कारण, घरी पण असलेच दोन बूट अजून आहेत.

जनता मूर्ख?

आपले एक भ्रष्टाचारी नेते पश्चिम महाराष्ट्रात भाषण ठोकीत असतात.

अहो, २० वर्षांपूर्वी एक फोन करायचा म्हटलं तर ६ रुपये लागायचे; आणि समोसा मात्र एका रुपयात मिळायचा.

आज मात्र उलटी परिस्थिती आहे.

आज समोसा ६ रुपयांना तर फोन १ रुपयापेक्षा कमी पैशांतसुद्धा करता येतो.

याचाच अर्थ, महागाई वाढलीय असा होत नाही बरं का. फक्त थोडी इकडची तिकडी झालीय.

विरोधी पक्षाला काही काम नाय म्हणून उगाच तुम्हाला वाटेल ती उदाहरणं देत बसतो बघा.

संशोधन म्हणजे काय?

जेव्हा आपण एखाद्या ठिकाणाहून किंवा मुळची एखाद्याची असलेली कल्पना चोरतो, तेव्हा तो कॉपीराईट कायद्याचा भंग ठरतो.

तर जेव्हा आपण अनेक ठिकाणांहून अशा अनेक कल्पना चोरतो, तेव्हा त्याला म्हणतात संशोधन.