सतर्क रहा...

आपल्या देशात “हाय अलर्ट” म्हणजे पोलिसाला हातात काठी पकडवून नाक्या-नाक्यावर उभे करणे.

जसे काय दहशतवादी “एके ४७” घेऊन नव्हे तर “म्हशी” घेऊन हल्ला करणार आहेत.

नाम है विजय दीनानाथ चौहान, हांय...

अमिताभ बच्चन आपल्या नुकत्याच घेतलेल्या नव्याकोर्‍या लक्झरी कार ओस्टिन मोर्टिन मधून जात होता.

अचानक अमिताभला कार चालविण्याची हुक्की आली.

त्याने ड्रायवरला मागे बसविले आणि स्वत: कार चालवण्याचा आनंद घेऊ लागला.

सिग्नल तोडल्याने एका ट्राफिक हवालदाराने गाडी अडवली.

आत वाकून बघतो तर अमिताभ !!!

हादरलाच तो हवालदार. त्याने आपल्या एसीपी साहेबांना हाक मारली.

हवालदार : सर, सिग्नल तोडला म्हणून मी ही गाडी अडवली. पण पावती फाडण्याची माझी हिम्मतच होत नाहीये. फार मोठी व्यक्ती बसलीय आत.

एसीपी : कोण राजा बसलाय?

हवालदार : सर, ते माहीत नाही. पण त्याने अमिताभ बच्चनला ड्रायवर ठेवलय.

आनंदोत्सव

पोलीस (एका चोराला) : काय रे, तू सोनाराच्या दुकानातून हार का चोरलास?

चोर : अहो साहेब, सोनारानेच ऑफर लावली होती की अक्षयतृतीयेच्या दिवशी शंभर टक्के लाभ घ्या म्हणून.

अदृश्य पोलीसमामा

एकजण चौकात सिग्नलला लाल दिवा असताना आपली गाडी दामटतो.

झाडामागे लपलेले पोलीसमामा चटकन गाडीसमोर येऊन त्याला बाजूला घेतात.

मामा : काय रे, लाल दिवा दिसला नाही का?

तो : साहेब, लाल दिवा दिसला की. पण तुम्ही नाही दिसलात ना.

White collar दरोडेखोर

एका बँकेत दरोडा पडतो.

टकलू हैवानाची गॅंग बँक लुटते.

दरोडेखोर पैसा एका बॅगेत घालून पलायन करणार, तोच बँकेचा कॅशियर एका टकल्याचे पाय धरतो आणि त्याला विनवणी करतो.

कॅशियर : कृपा करून हे रजिस्टरपण घेऊन जा हो. यात माझ्याकडून दोन लाखांचा गफला झालाय.

सैनिक का बनायचं?

मराठा बटालियनमधल्या दोन शूर जवानांचा हा संवाद.

पहिला जवान दुसर्‍याला : तू सैन्यात का आलास?

दूसरा जवान : कारण मी अनाथ आहे आणि मला युद्ध आवडतं. पण तू विवाहित असताना का आलास सैन्यात?

पहिला जवान : कारण मला शांतता हवी होती म्हणून.

सत्यवादी बेवडा

एकदा एका बेवड्याला एक हवालदार समजावत असतो की दारू पिण्याने संसार कसा उध्वस्त होतो ते.

पण बेवडा मात्र याच्या उलट दारू पिण्याने संसार कसा टिकतो ते हवालदाराला सांगत होता.

हवालदार : मला सांग, तुला बायको महत्वाची वाटते की दारू?

बेवडा : (एक क्षणही विचार न करता) दारू.

हवालदार : का?

बेवडा : कारण, जेव्हा बायको मला मारते, तेव्हा दारू पिलेला असल्यानेच मला लागत नाही. म्हणजे साहजिकच मी तिच्यावर हात उगारत नाही, रागवत नाही आणि आमचा संसार टिकून राहतो. आलं लक्षात?

वा रे पोलीस...

एका पोलीसाच्या घरात चोर शिरतात.

त्याच्या बायकोला याची चाहूल लागते.

बायको : अहो, उठा. उठा की. चोर शिरलेत घरात.

पोलीस : च्यायला, गप ए. मी आत्ता ड्युटीवर नाहीये.

नो एंट्री...

एक वाहनचालक नो एंट्रीत घुसला.

पुढे गेल्यावर त्याला मामा दिसले. पण पळणार तेवढ्यात दबा धरून बसलेल्या मामांनी या शिकारीला पकडले.

मामा : काय रे, दिसत नाही का, इथून नो एंट्री आहे म्हणून???

वाहनचालक : दिसतोय हो बोर्ड, पण मला वाटले की तो पिक्चरचा बोर्ड आहे.

बच्चे भी जानते है, इसके सारे गुण...

बच्चे भी जानते है, इसके सारे गुण...

माफ करा, वाटत असली तरीही ही “आयोडीन नमक”ची जाहिरात नाहीये...पुढे वाचा मग कळेलच.

मुलगा : पप्पा, ह्या प्रगतिपुस्तकावर सही द्या ना.

पोलीस बाप : हे काय, तुझा निकाल अजिबात चांगला नाही. एवढे कमी मार्क? आजपासून तुझं खेळणं, टीव्ही बघण सगळं बंद.

मुलगा : हे घ्या ५० रुपये आणि आजपासून तुमचं तोंड बंद.

पोलिसाचा सल्ला

एक वाहतूक पोलीस चौकात वाहतुकीचे नियमन करीत असताना त्याला एक माणूस माकड आपल्या खांद्यावर घेऊन जाताना दिसला.

वाहतूक पोलिसाने त्याला बजावले, "ए भाऊ, त्या प्राण्याला प्राणिसंग्रहालयात घेऊन जा पाहू."

काही दिवसांनी पुन्हा त्या वाहतूक पोलिसाला तो माणूस माकडासमवेत जाताना दिसला.

वाहतूक पोलीस : का रे, तुला मी काय सांगितलं होतं? विसरलास काय?

माणूस : नाही हो. मी त्यादिवशी माझ्या या प्रिय माकडाला तिथे घेऊन गेलो होतो. आज त्याला चित्रपटाला घेऊन जातो आहे.

वाट पहात आहे...

ट्रॅफिक हवालदार : अहो, थांबा थांबा. १०० च्या स्पीडने गाडी का चालवताय?

वाहनचालक : तुम्हीच तर तो बोर्ड लावलाय ना? (बोर्डकडे बोट दाखवून)

ट्रॅफिक हवालदार : हो, मग?

वाहनचालक : जरा नीट वाचा की मग...त्यावर लिहिलंय, "लक्षात ठेवा, घरी कुणीतरी तुमची वाट पहात आहे," म्हणून.

चोराची चोरी की बायकोची शिरजोरी?

एक चोर एका कापडाच्या दुकानात चोरी करताना पकडला जातो.

त्याला पोलिसांच्या ताब्यात दिले जाते.

चौकशी करताना :-

पोलीस : काय रे, तू एकाच दुकानात चोरी करण्यासाठी दुसर्‍यांदा का केलास?

चोर : साहेब, मी फक्त एकच ड्रेस चोरला हो. पण माझ्या बायकोला तो आवडला नाही म्हणून तो बदलून दूसरा आणण्यासाठी पुन्हा जावं लागलं.

बोटांचे ठसे

पोलीस इन्स्पेक्टर : हवालदार रेडे, तुम्ही चोर पकडला का?

हवालदार : नाही साहेब, पण त्याची निशाणी मिळाली.

इन्स्पेक्टर : काय ती?





हवालदार : त्याच्या बोटांचे ठसे.

इन्स्पेक्टर : कुठे?

हवालदार : माझ्या गालांवर.

मानवता

एकदा एक चोर एका धनाढ्य व्यापार्‍याच्या घरात घुसतो.

जिथे तिजोरी ठेवलेली असते, तिथे तो जाऊन पोचतो.

तिजोरीच्या बाजूला लिहिलेले असते...
तिजोरी फोडायची गरज नाही. बाजूलाच ठेवलेली ४२० नंबरची चावी तिजोरीच्या कुलपात घालून दोनदा फिरवा आणि मग समोरील लाल बटन दाबा.

चोर लाल बटन दाबतो तसा अलार्म वाजू लागतो आणि पोलिस येतात.
ते चोराला पकडून नेतात.

पकडून नेत असताना चोर मालकाला म्हणतो, "आज माझा माणुसकीवरचा विश्वासच उडाला."

साक्ष

वकील (साक्षीदारास) : तू म्हणतोस की भिंत ८ फुट उंच आणि तू जमिनीवर उभा होतास. भिंतीवर किंवा शिडीवर चढला नव्हतास.

साक्षीदार : बरोबर.

वकील : आता तुझी उंची ५ फुट आणि भिंतीची उंची ८ फुट. मग पलीकडे तो माणूस काय करत होता, हे तुला कसं काय दिसलं?

साक्षीदार : भिंतीला भगदाड होतं ना साहेब.

पंचनामा

रस्त्यात पडलेल नाणं उचलताना एकाचा गाडीखाली येऊन मृत्यू झाला.

पंचनाम्यात नैसर्गिक मृत्यु अशी नोंद होती.

पुढे खटला चालविल्यावर तपासात ते नाणं नसून थंडपेयाचं चकाकणारं झाकण असल्याचं निष्पन्न झालं.

तेव्हा अहवाल देण्यात आला, "मानसिक धक्क्याने मृत्यु."

तिकीट तिकीट

एक साधू रेल्वेने प्रवास करत असतो. तेवढ्यात तिकीट चेकर येतो.


चेकर साधूला विचारतो, "कुठे जायचय?"
साधू : जिथे रामाचा जन्म झाला होता, तिथे; अयोध्येला.


चेकर : बरं ठीक आहे, तिकीट दाखवा.
साधू : तिकीट तर नाहीय.




चेकर : चला मग.
साधू : कुठे?


चेकर : जिथे कृष्णाचा जन्म झाला होता, तिथे; जेलमध्ये.

मित्राचा खून

न्यायाधीश : का रे, तु तुझ्या मित्राचा खून दगडाने ठेचून ठेचून का केलास?

आरोपी : सायब, आमी गरीब माणसं ! आमच्याकडं रायफल, बंदूक कशी असणार? दगड फुकटात मिळत्यात. म्हणूनशान मी त्याला ठेचूनच मारला बगा.

स्पष्टीकरण

पोलिसाने रात्रीच्या वेळी एका माणसाला हटकले.
‘रात्रीच्या वेळी तू काय करतो आहेस ? बोल, काहीतरी स्पष्टीकरण दे.’
‘मला काही स्पष्टीकरण देता आल असत तर घरी जाऊन मी बायकोसमोरच उभा राहिलो नसतो का?’